യുക്തിവാദിക്ക് എതിരെ ഒരു വാക്സിന്‍

നമുക്ക് വരുന്ന ചില രോഗങ്ങളെ തടയാന്‍ വൈദ്യശാസ്ത്രം കണ്ടെത്തിയ ഒരു മരുന്നാണ് വാക്സിന്‍. ശക്തി കുറഞ്ഞതോ, മൃതമായതോ ആയ രോഗകാരി അണുക്കളോ, അവയുടെ കോശ ഭാഗങ്ങളോ വളരെ ചെറിയ അളവില്‍ നമ്മുടെ ശരീരത്തിലേക്ക് കടത്തിവിട്ട്, ശരീരത്തിന്റെ പ്രതിരോധ വ്യവസ്ഥയെ ഉത്തേജിപ്പിച്ച് രോഗപ്രതിരോധ ശേഷി നേടിയെടുക്കുക എന്നതാണ് അതിന്റെ രീതി. രോഗത്തെ തടയാന്‍ രോഗാണുവിനെ തന്നെ കുത്തിവെക്കുന്നു.

അതായത് നാം പ്രതീക്ഷിക്കുന്ന ഒരു ഫലം കിട്ടാനായി അതിന് നേരെ വിപരീതമായ ഒരു കാര്യം ചെയ്യുന്നു എന്ന് സാരം.

എന്നാല്‍ ഈ രീതി വൈദ്യശാസ്ത്ര രംഗത്ത് മാത്രം ഒതുക്കി നിര്‍ത്താവുന്ന ഒരു തത്വമല്ലെന്നാണ് അടുത്ത കാലത്തായി നടക്കുന്ന ചില മാറ്റളില്‍ നിന്ന് എനിക്ക് തോന്നുന്നു.
സാമൂഹ്യശാസ്ത്രത്തിലും ഇത്തരമൊരു വാക്സിന്‍ പ്രയോഗം നടത്തുന്നില്ലേ സംശയം.

സാമൂഹ്യശാസ്ത്രത്തിലെ വാക്സിന്‍ പ്രയോഗം

കഴിഞ്ഞ ഒരു നാല്‍പ്പത് കൊല്ലത്തെ നമ്മുടെ സാമൂഹ്യപ്രവര്‍ത്തനങ്ങളെ ഒന്ന് വിശകലനം ചെയ്യൂ. പല രംഗത്തുള്ള പല സംഘടനകളും പല പ്രമുഖ വ്യക്തികളും ഒക്കെ ഇവിടെ പ്രവര്‍ത്തിച്ചിരുന്നു. അവയില്‍ ഒരുപാടെണ്ണം നിര്‍ജ്ജീവമായി, ചിലവ ഇപ്പോഴും പ്രവര്‍ത്തിക്കുന്നുണ്ട്. ഇവയില്‍ കൂടുതലും ജനങ്ങളുടെ പക്ഷത്ത് നിന്ന് അധികാരികളും കമ്പനികളും ഒക്കെ ചെയ്യുന്ന ദ്രോഹ പ്രവര്‍ത്തികളെ ജന ശ്രദ്ധയിലേക്ക് കൊണ്ടുവരികയും അതിനുള്ള സമരങ്ങള്‍ നടത്തുകയും ഒക്കെ ചെയ്യുന്ന സംഘടനകളും വ്യക്തികളുമുണ്ടായിരുന്നു. പരിസ്ഥിതി, ആരോഗ്യം തുടങ്ങിയ വളരെ പ്രധാനപ്പെട്ടതും എന്നാല്‍ ശ്രദ്ധിക്കപ്പെടാത്തതുമായ പല രംഗത്തേയും പ്രശ്നങ്ങളിലേക്ക് വെളിച്ചം വീശാന്‍ അവര്‍ക്ക് കഴിഞ്ഞു.

ഉന്നതി വിദ്യാഭ്യാസമുള്ള, ഉന്നത സ്ഥാനങ്ങളലങ്കരിച്ചിരുന്ന, അംഗീകാരങ്ങളും പുരസ്താരങ്ങളും ഒക്കെ ലഭിച്ചിരുന്ന മഹദ്‌ വ്യക്തികളും അവര്‍ നയിച്ചിരുന്ന സംഘടനകളുമൊക്കെയായിരുന്നു അവ. അറിവ് പ്രചരപ്പിക്കുകയും അറിവിന്റെ തെറ്റായ ഉപയോഗങ്ങളെ ചോദ്യം ചെയ്യുകയും ചെയ്ത ഇത്തരം സംഘടനങ്ങള്‍ ജനങ്ങളുടെ സമരങ്ങളില്‍ അറിവിന്റെ പുതിയൊരു ആയുധമായിരുന്നു സമ്മാനിച്ചത്. സംഘടനകളിലെ അംഗങ്ങളും ഉയര്‍ന്ന മദ്ധ്യവര്‍ഗ്ഗക്കാരും ആയിരുന്നു. അങ്ങനെയുള്ള ഇവര്‍ റോഡിലൂടെ കൊടിയും പിടിച്ച് ജാഥ നടത്തിയാല്‍ സമൂഹത്തിലുണ്ടാവുന്ന സ്വാധീനം പറയാതെ തന്നെ താങ്കള്‍ക്ക് അറിയാമല്ലോ.

ജനപക്ഷത്ത് നിന്ന ഇവരെ നിശബ്ദരാക്കാനോ പറ്റുമെങ്കില്‍ വ്യവസ്ഥക്ക് വേണ്ടി വാദിക്കുന്നവരോ ആയി മാറ്റാന്‍ എങ്ങനെ കഴിയും? ആലോചിച്ചിട്ടുണ്ടോ? പണ്ട് രാജഭരണ കാലത്താണെങ്കില്‍ രാജഭടന്‍മാര്‍ വന്ന് ഭീഷണിപ്പെടുത്തിയാല്‍ മതിയായിരുന്നു. എന്നാല്‍ ഇന്ന് രാജഭരണത്തേക്കാള്‍ എളുപ്പമുള്ള വ്യവസ്ഥയാണ്. ജയിലോ, ചാട്ടയോ ഒന്നുമില്ലാതെ സ്വതന്ത്രരെന്ന് സ്വയം കരുതുന്ന ഈ വ്യക്തികളേയും അവരുടെ സംഘടനകളേയും അധികാരികളുടെ കിങ്കരന്‍മാരാക്കാന്‍ കഴിയും.

സാമൂഹ്യ വാക്സിന്റെ ഘടന

ഈ പുരോഗമന പ്രസ്ഥാനങ്ങള്‍ അറിവിന്റേയും ശാസ്ത്രീയതയുടേയും അടിസ്ഥാനത്തിലായിരുന്നു വ്യവസ്ഥയിലെ പ്രശ്നങ്ങളെ ചോദ്യം ചെയ്തിരുന്നത്. എന്നാല്‍ വിവരക്കേടും, അശാസ്ത്രീയതയും അടിസ്ഥാനമായ വേറൊരു കൂട്ടര്‍ വ്യവസ്ഥയിലെ പ്രശ്നങ്ങളെ പ്രതിഷേധങ്ങള്‍ പ്രകടിപ്പിച്ചാലെങ്ങനെയിരിക്കും? അതാണ് സാമൂഹ്യ വാക്സിന്‍.

വ്യവസ്ഥ കുറെയൊക്കെ ശാസ്ത്രീയമാണ്. അതുകൊണ്ട് പുരോഗമന പ്രസ്ഥാനങ്ങള്‍ വ്യവസ്ഥയുടെ കൂടെ നിന്നുകൊണ്ട് പുതിയതായി വന്ന ഈ കടുത്ത അസംബന്ധങ്ങളെ എതിര്‍ക്കാന്‍ തുടങ്ങി. അതൊടെ മുമ്പ് ഈ സംഘടനകള്‍ നിന്നിരുന്ന സ്ഥലത്ത് ഒരു ശൂന്യതയുണ്ടാവുകയും അവിടേക്ക് കൂടി പുതിയ അസംബന്ധ പ്രസ്ഥാനങ്ങള്‍ കയറിക്കൂടിത് അവര്‍ക്ക് സമൂഹത്തില്‍ സ്ഥാനമുണ്ടാക്കിക്കൊടുക്കുകയും ചെയ്തു.

ഉദാഹരണത്തിന് ആരോഗ്യരംഗം നോക്കൂ. ഇന്ന് എത്ര വ്യാജവൈദ്യന്‍മാരാണ് നാട് വാഴുന്നത്. അവര്‍ക്കെതിരെ മറ്റെല്ലാ കാര്യങ്ങളും മാറ്റിവെച്ച് പുരോഗമന പ്രസ്ഥാനങ്ങള്‍ സമരത്തിലാണ്. സ്വകാര്യമായാലും സര്‍ക്കാരായാലും ആധുനികവൈദ്യശാസ്ത്രം ആണോ, നമ്മളെല്ലാം ഒറ്റക്കെട്ടാണെന്ന വിചാരമാണ് ഇപ്പോള്‍. എന്തിന് 80കളില്‍ മരുന്ന് വ്യവസായത്തെ വിമര്‍ശിച്ചത് തെറ്റായി പോയി എന്ന് തുറന്ന് പറയുന്ന പുരോഗമനകാരികള്‍ പോലുമുണ്ട്. എന്ത് വിലകൊടുത്തും മുതലാളിയോടൊപ്പം നിന്ന് ശാസ്ത്രബോധം തിരിച്ച് പിടിക്കാന്‍ ശ്രമിക്കുകയാണ് അവര്‍.

ദശാബ്ദങ്ങളോളം കേരള സമൂഹത്തില്‍ ശാസ്ത്രബോധം പ്രചരിപ്പിച്ച് പ്രചരിപ്പിച്ച് അവര്‍ ഇപ്പോള്‍ നമ്മളോട് ചോദിക്കുന്നത്, “കേരളത്തിനെന്ത് പറ്റി?” എന്നാണ്. തങ്ങളുടെ പ്രവര്‍ത്തി മണ്ഡലത്തിലെ അടിസ്ഥാന പ്രശ്നത്തേക്കുറിച്ച് പോലും അറിയാത്ത ഇവരുടെ ശാസ്ത്രബോധത്തെ തന്നെ സംശയിപ്പിക്കുന്ന ചോദ്യമാണത്. കഷ്ടം എന്നേ പറയനാവുന്നുള്ളു.

ഫലത്തില്‍ എന്താണ് സംഭവിച്ചത്. ആരോഗ്യ രംഗത്തെ തെറ്റായ കാര്യങ്ങള്‍ മുമ്പത്തേതിനേക്കാള്‍ ഭീകരമായി. എന്തിന് ഇത്ര സ്വകാര്യ ആശുപത്രികള്‍. എന്തിന് മരുന്നിന് പേറ്റന്റ്, എന്നൊക്കെ ആരും ഒരു ചോദ്യവും ചോദിക്കുന്നില്ല. പേടിയാണ്. എന്തെങ്കിലും വിമര്‍ശിച്ചാല്‍ ആ വ്യജ വൈദ്യന്‍മാര്‍ അത് ഏറ്റടുത്ത് കൂടുതല്‍ ശക്തരാകില്ലേ എന്ന പേടിയാണ്. അത് തന്നെയാണ് വ്യവസ്ഥയും ആഗ്രഹിച്ചത്.

ശാസ്ത്രീയതയും അറിവും അടിസ്ഥാനത്തിലുള്ള സമരങ്ങളെ നേരിടാനായി കപടശാസ്ത്രീയതയും വിവരക്കേടും മറയായ ഒരു വാക്സിന്‍ കടത്തി വിട്ടു. അപ്പോള്‍ ശരിയായ സമരങ്ങള്‍ ആ പണി നിര്‍ത്തിയിട്ട് കപട സമരങ്ങളെ പരാജയപ്പെടുത്താനുള്ള ശ്രമങ്ങള്‍ മാത്രം നടത്തുന്നു.

എന്തിനേയും ഉള്‍ക്കൊള്ളുന്ന വ്യവസ്ഥ

ശതാബ്ദങ്ങളായി നമ്മുടെ ഈ ചൂഷണ വ്യവസ്ഥ ഒരു മാറ്റം കൂടാതെ നിലനില്‍ക്കുന്നതില്‍ താങ്കള്‍ക്ക് അത്ഭുതം തോന്നുണ്ടാവും. എന്നാല്‍ അതില്‍ അത്ഭുതമൊന്നുമില്ല. എതിര്‍ക്കുന്നവരേയും കൂടി വ്യവസ്ഥയുടെ ഭാഗമാക്കാന്‍ കഴിഞ്ഞതാണ് ഈ വ്യവസ്ഥയുടെ ഗുണം.

ഉദാഹരണത്തിന് ആരോഗ്യ രംഗത്തെ പ്രശ്നങ്ങള്‍ ജനങ്ങള്‍ക്ക് ബോധമുള്ള കാര്യമാണ്. അതിനെതിരെ ശാസ്ത്രീയതയില്‍ അടിസ്ഥാനമായ ജനകീയ എതിര്‍പ്പ് വളര്‍ന്ന് വന്നാല്‍ അത് അധികാരികളുടെ നിലനില്‍പ്പിനെ തന്നെ ബാധിക്കും. അത് സംഭവിക്കാതെ സ്വാഭാവികമായ എതിര്‍പ്പിനെ വഴിതിരിച്ച് വിടണം. അതാണ് വ്യാജവൈദ്യ ചികില്‍സകള്‍. ചികില്‍സമാത്രമാണ് ലക്ഷ്യമെങ്കില്‍ ഈ വ്യാജന്‍മാര്‍ക്ക് ശാസ്ത്രീയ ആരോഗ്യ കാര്യങ്ങള്‍ പറഞ്ഞാല്‍ പോരെ? അല്ല രാഷ്ട്രീയമാണെങ്കില്‍ ശാസ്ത്രീയ രാഷ്ട്രീയം പറ‍ഞ്ഞാല്‍ പോരേ? എന്നാല്‍ ഇതുരണ്ടുമല്ല. കാപട്യം നിറഞ്ഞ ആരോഗ്യവും രാഷ്ട്രീയവുമാണ് അവര്‍ പറയുന്നത്. അതായത് ശരിയായ സംവാദത്തില്‍ സ്വയം തോല്‍ക്കപ്പെടുന്ന ആശയങ്ങള്‍. അങ്ങനെ ജനകീയ സമരങ്ങള്‍ക്ക് സ്വയം മുനയൊടിഞ്ഞോളും.

ഭീകരവാദമാണ് മറ്റൊരു ഉദാഹരണം. അവിടെയും ഇതേ തന്ത്രമാണ് പ്രയോഗിക്കുന്നത്. മുതലാളിത്തത്തിന്റെ, പ്രത്യേകിച്ച് പടിഞ്ഞാറന്‍ രാജ്യങ്ങളുടെ വിഭവ ചൂഷണത്തിനെതിരെ സ്വാഭാവിക ജനകീയ പ്രതിഷേധമുണ്ട്. എന്നാല്‍ അതിനെ മറച്ച് വെച്ച് അവര്‍ തീവൃവാദി സംഘങ്ങളെ സൃഷ്ടിച്ച്, തീവൃവാദികളെ പ്രതിപക്ഷമായി വരുത്തിത്തീര്‍ത്തും. അതോടെ സ്വാഭാവിക ജനകീയ പ്രതിഷേധത്തിന് നിലയില്ലാതെയായി. തീവൃവാദികള്‍ക്ക് പണവും ആയുധവും നല്‍ക്കുന്നത് പടിഞ്ഞാറന്‍ രാജ്യങ്ങളാണ്.

ഫെമിനിസം, സ്വത്വവാദം ഒക്കെ മറ്റുള്ള ഉദാഹരണങ്ങളാണ്.. അങ്ങനെ എല്ലായിടത്തും അവര്‍ സൃഷ്ടിക്കുന്ന കപട പ്രതിപക്ഷ അരങ്ങിലെ വെറും കഥാപാത്രങ്ങള്‍ മാത്രമായി നാം മാറുകയാണ്.

അങ്ങനെ സാമൂഹ്യ വാക്സിനുകള്‍ വിജയിക്കുന്നു. ചുരുക്കത്തില്‍ പറഞ്ഞാല്‍ കോര്‍പ്പറേറ്റുകള്‍ക്കെതിരെ സംസാരിക്കാന്‍ ഡിഗ്രിയും സര്‍ട്ടിഫിക്കറ്റും ഒന്നുമില്ലാത്തെ വെറും വ്യാജന്‍മാത്രം അവശേഷിക്കുന്നു. (ഞന്‍ ഉള്‍പ്പടെ).
___
ഓടോ- എന്റെ അഭിപ്രായം, എന്റെ വിശ്വാസം എന്ന വാക്കുകള്‍ വ്യാജവൈദ്യന്‍മാര്‍ സ്ഥിരമായി പറയുന്നത് ശ്രദ്ധിച്ചിരിക്കും. മനസിലാക്കുക, അത് വളരെ വലിയ ഒരു രാഷ്ട്രീയ plot ആണ്. Dark Age 2.0 യിലേക്കുള്ള യാത്രക്കായി സത്യം എന്നത് വെറുമൊരു അഭിപ്രായം മാത്രമാണെന്ന് സമൂഹത്തെ പഠിപ്പിക്കുകയാണത്.

എഴുതിയത്: ജഗദീശ്.എസ്സ്

ഒരു മറുപടി കൊടുക്കുക

Fill in your details below or click an icon to log in:

WordPress.com Logo

You are commenting using your WordPress.com account. Log Out / മാറ്റുക )

Twitter picture

You are commenting using your Twitter account. Log Out / മാറ്റുക )

Facebook photo

You are commenting using your Facebook account. Log Out / മാറ്റുക )

Google+ photo

You are commenting using your Google+ account. Log Out / മാറ്റുക )